موضوع: العودة الى المدرسة وما ادراك مالعودة الى المدرسة السبت أكتوبر 18, 2008 9:26 am
طبعا الموضوع المفروض اكتبه امس بس اعرفكم ولا واحد طب المدرسة ولا فكرة بروح لجامعته فقررت انزلة اليوم والمفروض بعد انزله السبت الجاي ويوجد تنوية بذلك اخر الموضوع << ياحياة ام الشقاء على الكلام الذوق بوسه لنفسي على كلامي نرجع بعد الفاصل المفاجئ لكن لاخذ الحيطة والحذر نزلته لكم اليوم
يالله نطب في الموضوع صاروخ
وجع ورا ماتقومون تنامون الحين ؟؟ الساعه ثنتين ... ترا السبت مدرسه متى بتنامون وتصحون ؟ والا ناوين تروحون مواصلين ان شاء الله
انا لله وانا اليه راجعون .. وش جاب هالطاري اللي يسد النفس الحين يمه ؟
ايه جايزن لتس السهر والتسدح عند هالكمبيوتر كل ليله الين تصبحين وتخمدين ولاتقومين الا المغرب
يمه تكفين خلاص والله ان لي اسبوع وانا احس بضيقه كل ماذكرت ان الدراسه قربت
لا يمه سامعتس بس المدير قايل لنا اذا بدت الدراسه لاتجون الاسبوع الاول مايحتاج وش انتم طايرين عليه
ماشاء الله اجل المدير يقول وش انتم طايرين عليه وانا اقول دحيم من طالع عليه اجل تونا مسجلينه هالسنه بأولى ابتدائي والبارح جايني يقول خلاص يمه قررت افصل والا ابغيب اقول قم قامة تشيلك رح اخمد لااروح انادي ابوك يجي يقطع عقاله على ظهرك يالهيس
قام بعد هالهواش العائلي الهادف كل واحد منهم وراح لغرفته ودمعته على خده متحسرين على هالاجازه اللي راحت بلمح البصر والعوده للمدارس وخصوصا انهم بيدرسون عشره ايام وبعدها بيجي رمضان ويكملون دراسه ومايحتاج عاد اعلمكم عن الدراسه برمضان
اهلين صباح الخير حبيبي .... اليوم صاحي من النوم بدري لايكون تعبان والا فيك شي ؟
لا ابدا ياماما بس فرحان مره ان الدراسه راح تبدأ بكره ومن كثر ماانا مشتاق للمدرسه ماقدرت اكمل نومي ( وجه يقول الله يخلف ) حبيب قلبي انت وان شاء الله كل اغراض المدرسه اللي اشتريناها قبل شهر جاهزه وكامله ؟ ايوه ياماما من اسبوع وانا مرتب كل شي وجاهز
يالله غربل هالبنت كانها معوقه هي ونومها والا فيه وحده تنام ورجولها بالارض وراسها على السرير
قومي ياللي مهبلتن فيني قومي لابارك الله في هالخشيشه .... هذا وانا اقول الحين بنيتي هي اللي ابقوم والقاها مقومتن اخوانها ومصلحتن فطورهم ... الله يخلف علي بس كان الله مارزقني ببنت مثل الناس
وشااااااااااااااو وش فيه بعد ؟ وش ان مسويه
لا ابد ماسويتي شي قومي بس يالله ترا الساعه سبع يالله قومي وراتس مدرسه
الساعه سبع ايه طيب اروح
ايه بتروحين ورجلتس فوق رقبتس يالهيسه
يماااااااااااه وين اروح وانا ماتسبحت ولا غسلت شعري ولازينت خشتي ؟؟ والا تبين اروح اول يوم تسني طراره ؟
هذا حال اكثر البيوت اخر ايام الاجازه واول ايام المدرسه وسبحان الله نفس السيناريو
الناس ليلة السبت اللي هو اول ايام الدراسه تلقاهم انواع الزحمات عند المكتبات والحلاقين والمخابز عشان الصامولي
على اني من زمان عن الدراسه الا انها جرت العاده السنويه وهي الاحساس بضيقة الصدر والغلقه وكأني ابدرس والله والبركه من هاللي نشوفه
مشكلتنا اهلنا ماحببونا بالدراسه ولايهون بعض المدرسين اللي يكرهون الواحد بحياته مو بالمدرسه بعد
اذكر لما كنت بخامس كان فيه مدرس سعودي مدري ليش احس انه يكرهني وغير انه يكرهني يحاول دائما وفي كل درس له يحرجني امام زملائي الطلبه والمشكله يدرسنا ماده الرياضيات وتسبب علي حسبي الله عليه لدرجه اني اذا سمعت كلمة رياضيات يجيني شي مثل السباه ولاعاد اركز واحس ان فيني غثيان والارض تلف بي <<<
اذكر مره كان يوم اربعاء وكان معطينا واجب ويقول السبت ابخلي كل واحد يقوم يحل لنا الواجب على السبوره ويشرح لنا طريقة حله
ومن طلعت المدرسه هذاك اليوم وانا اكحكح ومسوي نفسي مريض عشان اغيب السبت حسبي الله عليه نكد علي ولاخلاني استانس هذاك الويك اند ... لاويبونا نحب الدراسه بعد <<< تحمس
اللي خلانا او اغلبنا يكره الدراسه صدقوني من هالاشياء اللي ذكرتها وش بيضر اهلنا اول مابدينا ندرس يحاولون يفهموننا ان المدرسه شي حلو وانها هي المكان السليم اللي تكون فيه صداقات مهب يهددوننا فيها وكل ماعصبوا عليك قالوا لك ترا ابقول للمدرس يجلدك ويخلونك بالمدرسه ولايطلعونك منها هالاسبوع كله
والا فيه مدرس الله يذكره بالخير يوم كنت بثاني ابتدائي يقول اللي ماراح يكتب الواجب ترا ابحطه بغرفه مظلمة وكلها فيران خخخخخخخخخخخخخخخخخخخخخخخخخ الله ابو الاسلوب ياشيخ
ورا مايخلون مدرسات الابتدائي من اولى لرابع لبنانيات <<< بدأ بالحتسي اللي ماله سنع
لا صدق يعني المفروض المراحل الأولى من الابتدائي يجيبون حريم من اللي اعمارهم اربعين وفوق يعني اتوقع مع هالاشكال ممكن الطالب يحس بالامان وينتج والا يخلون الدراسه بأولى وثاني وثالث ابتدائي بملاهي عشان تلقون الواحد قايم من الفجر يحتري متى يروح بس للمدرسه مهب على طول يصدمونه بواحد يقول ابوديك غرفه مظلمه مافيها الا فيران
تعودت كل سنه قبل بداية الدراسه بيوم اكتب موضوع والصراحه اعتبره متنفس لجميع الطلاب يعبرون عن اللي في خاطرهم وياخذون راحتهم
السبت أكتوبر 18, 2008 9:26 am